Kaskau-ah Mizorama kîr tum an awm lo

Tripura relief camp paruka Mizoram Bru-te Mizorama lak letna tura Kaskau camp-a awmte enfiahnaah nimin thleng khan Bru zing­ah inenfiahtir duh an la awm lo zel a; Kaskau camp bika enfiah hun chu nimin tlai dar 4:00 khan a tàwp.

Mizorama lêt duhte enfiah tura Mizoram sorkar tirh officer-te chuan June 2, 2015 aṭang khan Kaukau camp-ah office hawngin Bru-te chu an nghak a, mahse a tir aṭanga nimin tlai thleng khan Mizorama lêt tuma inenfiahtir an awm lo a ni.

Home department hotute chuan, Tripura transit camp paruka Mizoram Bru awm­te lak letna tura sorkarin Road Map a duan, Supreme Court-in a pawmpui tawh angin camp hrang hrangah a tahtawlin Mizorama kîr duhte enfiah hna an thawk zui zel dawn a, Mizoram mi dik tak an ni tih finfiah hnua Mizorama kîr duhte chu lak kîr an nih tur thu an sawi.

Mamit aṭanga thu dawn danin, Kaskau camp-ah inenfiahtir an awm loh avangin June 8, 2015 aṭanga Kaskau camp-a mite lak let tum chu tihpuitlin theih a ni dawn loin a lang a; mahse ruahman sa angin Khakchangpara camp-ah June 15-18 chhungin enfiah hna thawh chhunzawm leh a ni ang.