Health Minister-in Civil Hospital a enfiah

Health & Family Welfare minister Dr R Lalthangliana chuan nimin zing khan Civil Hospital, Aizawl a tlawh a; main building, blood bank building leh trauma centre sakna tur hmuna hnathawh tur leh siam ṭhat ngaite a endik.

Dr R Lalthangliana chuan, Civil Hospital, Aizawl (CHA) chu Mizorama sorkar damdawi-in lian ber a nih thu sawiin, "Mizoram hmun tin aṭanga damlote'n an pankhawm a nih avangin theih ang tâwka enkawl uluk leh ngaihven a ṭul. Building pui ber hi kum 30 kal ta hma lama sak a nih avangin a hlui tawh a, damlo tan leh mipui tan a him loin a hlauhawm tawh hlea hriat a ni. Aizawl khawpui lûn lai bera awm a ni a, tun lai design thar ang bera sak ṭhat leh thuam a ṭul tawh hle," a ti.

Health Minister chuan, trauma centre sakna tur chu awm sa a nih avangin hmanhmawh thei ang bera hmalak a ṭul thu a sawi a; ṭhutkhawm ko nghal turin thuneitute a hrilh. Health department hotute chuan, CHA building chu quality control lamin an endik tawh thu te, damdawi-in pui ber luh dawna zarhliap chu steel structure-a tih ṭhat thuai a nih tur thu te, trauma centre sak hna chu ṭan mai an tum laiin, Smart City Project hnuaiah khung a nih avangin a satu turte nen drawing thar duan a nih thute Minister an hrilh a; a hmuna an en aṭanga siamṭhat ngai lai leh chei ṭhat ngaite an sawiho nghal.

Health Minister hi Health & Family Welfare Board vice chairman Dr ZR Thiamsanga, bialtu councillor B Lalawmpuii, Health Secretary, PWD Engineer-in-Chief, PHE Chief Engineer (Building), Aizawl DC leh official dangte'n an ṭawiawm a ni.