Energy drink pali zawrh leh hralh khap
Health department-a Food Safety Commissioner chuan energy drink ṭhenkhat - Monster, Tzinga, Cloud 9 Pomegranade/Grape leh Akoaroma te chu Mizoram chhungah zawrh leh hralh khap a nih thu a puang.
Health joint director (Food and Drugs) Lalsawma'n nimina hriattirna a chhuah danin, Monster, Tzinga, Cloud 9 Pomegranade/Grape leh Akoaroma te chu sorkar laipuia Food Safety & Standards Authority of India-in mihring hriselna atana ṭha loa a ngaih avangin India ram pumah zawrh leh hralh a khap a ni.
Food Safety Commissioner chuan, Monster, Tzinga, Cloud 9 Pomegranade/Grape leh Akoaroma te chu mihring hriselna atana pawi thei a nih bakah, Food Safety & Standards Act, 2006 leh Rules and Regulation 2011 kalha siam a nih thu a tarlang a, "Thu leh awm hma chuan Mizoram chhunga zawrh leh hralh khap a ni a, thupek zâwm lote chu dan angin an chungah action lak a ni ang," a ti.
Food Safety Commissioner chuan, tunlaiin Maggi noodle him tawk loh thu sawi a tam avangin laboratory-ah endik mek a ni a, thu chiang zawk nghah mek a nih thu a puang bawk.