FCSCA-in inremchem kawngah tan la - John Rotluangliana

Food Civil Supply & Consumers Affairs (FCSCA) minister John Rotluangliana chuan, FCSCA department chu ei leh bar dinhmun siamṭhatna tura inrenchem kawnga ṭan la (economic measure) nasa ber department an ni hial mai thei niin a sawi.

John Rotluangliana hian Ninga­ni khan Saiha a tlawh a, amah lo hmuaktute hmaah thu sawiin, "Thil man sang chho zel avangin buhfai kg-ah Rs. 9.5 a hralh ṭhin kha Rs. 15-a hralh a ṭul ta a ni. Quota leh special permit-te kan tihtawp vek avang­in kudama buhfai chhêkkhawl a tam phah sawt a ni," a ti.

FCSCA Minister sawi danin, FCI aṭanga buhfai kg. khat Rs. 28.81-a lei ṭhin chu titawpin, local supplier aṭangin kg. khat Rs. 25.75-a lei a ni a, chu vang chuan sorkarin thla tin cheng vbc. 7 aia tam a hum thei a; kum khatah chuan vbc. 90 vel a hum thei dawn a ni.

John Rotluangliana chuan, Aizawl traffic tihthawlna atana sikul ṭan hun thlak anga thing­tlang mipuite zirtir an awm tih sawiin, chu chu a dik lo thu a sawi a, "Zing thawh tlai leh zan men rei culture Mizote zinga intuh mek siamṭhat nan leh Mizoram mipuite a hnam anga kan hrisel zawk thei nana ti kan ni a, tunah chuan zing thawh nachang hre lote pawh dar 6-ah chuan an tho val val tawh a ni," a ti.

'Mu rei suh, i lo pachhe dah a nge' tih chu hre reng tura chah­in, John Rotluangliana chuan, "Zirlai naupang, KG-I aṭanga tho hma ṭhinte chuan Class-X vel a zir thlen chuan thawh hma chu habit-ah a neih tawh ang," a ti a; chuvang chuan sikul kal hma chu sorkarin kaltlangpui ṭha a ti niin a sawi.

John Rotluanglina hian nimin zing khan Saiha-a a department chan pathum FCSCA, Transport leh Tourism hmunhmate leh ramte a fang kual a ni.