Parbung OC-in Mizoram HM a chháng

Manipur-a Parbung Police Station OC TT Zuola (Tlangthangzuala) chuan, Mizoram Home minister R Lalzirliana'n HPC(D)-te ṭanpui ṭhina a puhna chu thu dik lo niin a tarlang a, "Min puh theihna evidence a neih chuan tilang se la, eng ang enquiry pawh ka cho e," a ti.

Parbung PS OC TT Zuola chuan, tuna a hna (Parbung PS OC) chu April 17, 2015-ah a thawk ṭan tih sawiin, a area chhunga HPC(D) hel hriat a neih loh thu a sawi a, "HPC(D) ho silaimu phurhsak leh supply anga min puhna hi dâwt leh awm ze nei lo a ni," a ti a; HPC(D)-te silaimu tur a phurhsak tih finfiahna a awm chuan Manipur sorkarah a inpe thei a, a hna aṭangin a bàn tur thu a sawi.

TT Zuola chuan, May 9, 2015-a Malsawmkima (L) ruang enfiah turin Manipur-a deputy SP pakhat nen Aizawlah an kal thu leh Aizawla police hotute nen pawh rilru inhmu takin case chungchang an sawiho thu a sawi a; Home minister R Lalzirliana chu thil hrechiang loa amah puhchhiaah puhin, thu dik leh belhchian dâwl chauh sawi tawh se a duh thu a sawi bawk.