Chhiatna atan emergency fund siam remti

Mizoram State Disaster Management Authority (SDMA) chu nimin khan an chairman, chief minister Lal Thanhawla hoin an ṭhukhawm a; khualrel chhiatna tuarte chhawm­dawlna pek thuai a nih theih nan State Disaster Response Force (SDRF) fund aṭangin emergency fund siam an remti.

Sorkarin chhiatna thleng thei a chhinchhiah piah lama state tinin an state bik ṭheuha chhiat tawh theih list, 14th Finance Commission-in siam tura rawtna a siam bawhzuina chu meeting chuan a pawm a ni.

Chhiat tawkte chhawm­dawlna hian chhiat tâwktu chu a eizawnna hnaa a thawh lai emaw, a kal lam emaw, a haw lam emawa chhiat tawkte a huam a; chhawmdawlna sum chu SDRF fund aṭanga 10% dah tur a ni.

Meeting-ah hian Disaster Management Act, 2005-in a sawi angin, chhiatrupna thleng thei tihtlem, State Disaster Mitigation Fund siam a, kum 2015-16 chhunga cheng vbc. 10 tal dah rawt­na pawh pawm a ni.

Meeting chuan, sorkar department tinin Disaster Management Plan nei tura tih an nih anga department 12-in SDMA-a The Departmental Emergency Support Function Plan an thehluhte an pawm a; Administrative Training Institute-a Disaster Management Cell-ah deputy director (Training) leh assistant director (Training/Operation) post siam te, National Disaster Response

Force Training Centre chu 5th. IR Battalion hmun, Lungverha aṭanga Central Training Institute (CTI), Sesawnga sawn rawtnate an pawm bawk.