Lawngtlaia bank-te hnathawh thlirho

Lawngtlai Chairman J Hmingthanmawia kaih­hruaiin nimin khan Lawngtlai DC Conference Hall-ah Lawng­tlai District Con­sultative Committee, Dis­trict Level Review Com­mittee leh District Level Security Committee-te meeting neih a ni a, De­cember 2014 leh March 2015 inkara Lawngtlaia bank hnathawhte an thlirho.

Chairman J Hming­thanmawia chuan, bank-te chu mipuite sum vawng­tu leh mipui­te dâwm­kânna tur sum theh­chhuak theitu an nih avangin an pawimawh a, sorkar pawhin bank-te tih tur mumal takin a zam tih a sawi a, "Sorkarin tih tura a tihte ngaihthaha mahni sahmìm tihpuarna ringawt ngaihtuah bank kan awm a nih chuan insiam ṭhat thuai a ṭul ang," a ti a; hmasawn a ṭulna apianga chak taka bawhzui turin bank enkawltu hotute a chah.

Meeting-ah hian SBI, Lunglei-a chief manager James LH Pachuau-in report a pe a; report-te chu thlirhoin, hmasawn ngaihna lai leh siam ṭhat ngai thil hrang hrangte an sawi zui a ni.

Meeting chuan, Canara Bank, HDFC Bank leh MRB Lunglei Chanmari Barnch-te chu pawisa an dawn aṭanga pûk chhuahtir tur zat bituk hniam ber 60% an tlin theih nan hma la turin an ti a; Agriculture lama hmasawn nan loan tam zawk pe chhuak turin bank zawng zawngte'n ṭan la se, an ti. Financial literacy campaign neih ṭhin an rel a; police petrol log book pawh mumal taka hman ve tawh ni se, an tih bakah, Canara Bank chu pawisa lem endikna khawl nei ve ngei turin an ti bawk.

Lawngtlai district-ah hian bank panga - State bank of India, Canara Bank. HDFC Bank, Mizoram Rural Bank leh Mizoram Cooperative Apex Bank te an awm a; MRB-in branch panga, SBI-in branch pahnih an nei a, bank dangte chuan branch pakhat ṭheuh an nei a ni.