Service tax sáng vangin thil man a to dawn
Union Finance Minister Arun Jaitley chuan kumin February 28-a Union Budget 2015-16 a pharh ṭumin, service tax chu 12.36% aṭangin 14%-ah tihsan a rawt a, service tax sang hi June 1 aṭanga hman ṭan a ni.
Service tax sang hian mobile phone, cinema, railways, airlines, banking, insurance, advertising, architecture, construction, credit card, event management leh tour operator te a huam.
Railways, airlines leh tour operator-a service tax tihsan hian zinna senso a tisang dawn a, hei hian rel leh thlawhtheihna chuan man a tisang dawn a ni.
Service tax chu eng nge?
Service tax chu sorkar laipuiin service provider te hnen aṭanga chhiah a lak a ni a, mahse Finance Act, 1994, Section 66 D negative list-a awm aṭang chuan chhiah hi lak tur a ni lo. Chhiah hi service provider te chawi tur ni mah se mipuiin service an lei aṭangin a manah an chawi tel ṭhin.
Kum 1994 khan Prime Minister hlui, Dr Manmohan Singh-a'n Union Finance Minister hna a chelh laiin, tax reform siam tumin, Dr.Raja Chelliah kaihhruaina hnuaiah Committee a din a, committe chuan service tax lak rawtin, kum 1994, July 15 aṭang khan lak ṭan a ni.
Eng nge service tax pek ṭulna?
Sorkarin value added tax (VAT) a lak hnuah eng vangin nge service tax pek a ṭul kher tiin zawhna kan siam thei. Mahse bungraw pakhat lei turin service hrang hrang kan mamawh ṭhin a ni.
Entirna: Restaurant lianah thil ei tura kan kalin, ei tur an rawn chhawp man chauh kan chawi ngai lo. Eisiamtu te'n kan ei tur an siam man te, waiter te'n dawhkana min rawn chhawpsak mante hi kan ei thil ei manah kan chawi tel ṭhin a, VAT bakah service atana mipuiin pawisa an chawi aṭangin sorkarin chhiah a la leh ta a ni.
Negative list-a tel langsar zual
Sorkar laipui chuan service hrang hrang aṭanga chhiah lak lohna tur a siam leh a, heng te hi Finance Act, 1994, Section 66 D-ah negative list tiin a tarlang. Negative list-a tel mipuiin service tax an chawi lohna langsar zualte chu transportation-ah te, agriculture product leh a kaihhnawih service zawng zawngah te, post office-a lehkha leh bungraw thawn manah te a ni.
Sorkar chuan sumdawnna te tham deuh, financial year khat chhunga an service pek cheng nuai 10 hu tling lote chu service tax a awltir bawk.
Thil man sang tur
Indian Railways chuan service tax sang avang hian First Class leh AC class rel chuan man leh rela bungraw phurh man chu 0.5%-a tihsan an tum thu an tarlang.
Service tax sang hian restaurant-a thil man te pawh a tisan phah dawn bawk.
India ram state dangah event management-a service tax tihsan hian inneihna leh puipunna programme hrang hranga senso a tihtam phah dawn a ni.
Banking service-ah mipuite pawisa chawi a pun phah dawn bawk a, credit card hmangtute chuan service an hman man an chawi tam dawn bakah insurance tihnaa pawisa chawi ngaite pawh a pung bawk ang.
Mobile phone operator te chuan chhiah tihsan thu hi an customer-te an hriattir tawh a, hei hian internet pack leh call rate te thlengin a nghawng rin a ni.
Sorkar chuan education service-a chhiah a lak a tipung bawk a, mimal zirna-in admission fee leh senso dangte a san phah rin a ni bawk.
Construction company te leh architecture service tax sang hian in man a tisang bawk ang.
Mithiamte thusawi
Confederation of Real Estate Developers Association of India (CREDAI) Chairman Lalit Jain chuan tax sang vang hian chenna in lei duhte chuan an man 0.5%-a sangin an lei a ṭul tur thu Union Budget pass a nih hnu lawk khan a lo sawi tawh a ni.
Beauty salon service provider, Marico Kaya Enterprise Limited CEO S Subramanian pawhin service tax sang chu beauty salons leh spa tlawh man chu a san tur thu a sawi a, hei hian inneih senso thlengin a nghawng dawn a ni, a ti.
India ram McDonald enkawltu, Westlife Development vice-chairman Amit Jatia chuan service tax sang vangin India rama puma an restaurant-ah thil ei man tihsan an tum thu kumin February 28-a Union Budget pass a nih hnu lawk khan a lo sawi tawh bawk.