India rama khawpui thianghlim ber Aizawl

Nimin, December 2 kha National Pollution Prevention Day a ni a, he ni pual hian Mizoram Pollution Control Board chuan (MPCB) chuan thuchah a tichhuak. MPCB chuan, Aizawl chu India rama state khawpui thianghlim ber a nih thu tarlangin, Mizoram tui, boruak, chênna leh a velte tithianghlim zel tura ṭa la thar turin mipui an sáwm.

MPCB chuan, Central Pollution Control Board (CPCB)-in boruak bawlh­hlawh dan a tehna, air quality index (AQI) thar berah India rama khawpui 119 zingah Mizoram khawpui Aizawl chu khawpui boruak thianghlim ber a ni tih an tarlang.

Aizawl, khawpui thianghlim ber a nih theih chhan chu mipui thawhhona leh thuawihna rah a ni tih sawiin MPCB chuan, "Covid-19 donaa kan hmalakna chak tak avang te, bawlhhlawh paih dana hmá kan sâwnna te, motor khû leh industry aṭanga boruak chhe chhuak tur vènnaa ṭan lâk sauh sauh vângte a ni a, a ropui hle," an ti.

Mizoram boruak, tui leh chhehvel dinhmun a ṭhat zel a, thianghlimna kawnga hmasawn zel a nih theih nan ṭang mar reng turin MPCB chuan mipui an ngen a, "Bawlhhlawh neih tlem, a paih dan ruahmanna zawm ṭhat, plastic lam chi hman tlem, hman nawn uar, motor khu chhuakte a hun taka endik ṭhin, industry din kawnga dan ṭha taka zawm a ṭûlziate i hre thar leh ang u," an ti. Pollution vènna ní-ah ngaihtuahna thar nen ṭang thar zel turin mipui an sáwm a ni.