Cyber Safety Awareness Month hawng

Mizoram Police leh Cyber Peace Foundation (CPF)-in an buatsaih, 'Cyber Safety Awareness Month' chu December 1, Thawhlehni khan hawn a ni a; Director General of Police SBK Singh-a'n a hmanpui.

Cyber Safety Awareness Month-in a tum ber chu, mipuite'n him taka internet an hman theih dan tur buaipui a ni a; a bikin naupang, hmeichhia leh kum upa lamte tana buatsaih a ni. Internet kaltlanga sualna leh inbumna hrang hrang - child pornography, stalking leh cyber grooming, hmeichhiate leh naupangte chunga awm tawh ṭhinte sawi lan a, invên dan leh pumpelh dan turte puanzar a ni ang.

DGP SBK Singh chuan, Cyber Peace Foundation-in thla khat chhung awareness campaign neihna tura Mizoram a thlang chu lawmawm a tih thu a sawi a; Mizoram chu ziak leh chhiar tam lamah India rama pahnihna a nih thu leh internet hmangtu pawh an tam thu sawiin, awareness campaign chuan internet hmangtu, a bikin Mizo zingah him taka an hman theih dan tur zirtirna a pek ngei a beisei thu a sawi a ni.