MLA hoa sangha man an dem

Association for Environmental Preservation (ASEP) chuan thuchhuah siamin, Phaizau khawtlangin an humhalh lui dunga Mamit bialtu MLA hoa bomb hmanga sangha man a ni chu an dem thu an tarlang.

ASEP chuan, bomb hmanga sangha man an awm thu an hriatin lungchhiatthlak an tih thu sawiin, "Sorkarin lui dung nungcha humhalh tura uar taka zirtirna a pek chhuah mek lai leh khaw hrang hrangin an huam chhunga luite an humhalh chur chur laia sorkarin a phal loh hmanraw hmanga thil tih a awm hi a pawi tak zet a ni," an ti.

Phaizau khawtlangin lui an humhalh chhunga pawi khawihtute chu dan anga hrem ngei ni se an duh thu sawiin ASEP chuan, "Pawi khawihtu zingah ram roreltu leh dan siamtu zinga mi Mamit bialtu MLA a tel ve hi a pawi lehzual tak meuh. Mi dang zirtirtu leh khaptu tur ni zawk si, hetianga pawi khawitu zinga a tel ve hi a pawi tak zet a ni," an ti a; tun hnuah thleng tawh lo se an duh thu an tarlang.

Conservation of Mizoram chuan nungchate leh an chenna chereu nasat avangin harsatna hrang hrang a thleng mek tih tarlangin, "Hetiang a nih laia Phaizau huam chhung luidunga bomb hmanga sangha man an awm leh a titu zinga ram roreltu hming lang hi pawi kan ti hle. Hetiang thil a thleng hi kan dem takzet," an ti.