Mizoram Police Sports Meet ṭan a ni; Ruihhlo zuarte nena inzawmte'n hremna an pumpelh lo ang - CM

Mizoram Police Sports Meet vawi 22-na chu nimin khan 1st Bn. MAP Playground, Armed Vengah ṭan a ni a, chief minister Lalduhoma'n a hawng. CM chuan, ruihhlo zuarte nena inzawmte'n hremna an pumpelh loh tur thu a sawi.

Chief Minister chuan, ruihhlo donaah thâ an thlah dawn lo tih sawiin, "Beidawng loin kan kal zel dawn. Ruihhlo donaah police-te in pawimawh a, sum avangin ruihhlo zuarte nen insuih zawm suh u. Ruihhlo zuarte nena insuih zawmte chuan hremna an pumpelh lo ang," a ti.

Ṭhalaite ei chhetu langsar ber chu zu leh ruihhlo a nih thu sawiin Lalduhoma chuan, "Kan ûmbo vek thei lo mai thei, ram changkang zawkte pawhin 100% chu an tibo thei lo," a ti a, Pathianin sual theih lohna hmunah Mizote a dah bik loh thu a sawi.

Lalduhoma chuan, police-te indaih lohna an hriat thu sawiin, "Department dangte pawh an indaih lo. Indaih loh chhan tam tak hi thawk mekte zinga chhawr tlak kan tlem vang a nihte kan hlau. A dap chhuak tur kan din. Thawk tlak lote chu voluntary pension-a chhuahtir kan tum," a ti.

Chief Minister sawi danin, department ṭhenkhat phei chu hnaruak hnawhkhah vat loh chuan kum rei lotea tluchhe theite pawh an awma hriat a ni. A tahtawla hnawh khah zel a ni dawn.

Thawk tlak lote chu tihmual­pho emaw hrem an tum lo tih sawiin Duhoma chuan, "Dan angin ṭha takin voluntary-in an chhuahtir theih. Sorkar hnathawk quality tihsan kan tum a, kan tihsan chuan a product quality pawh a ṭha ang," a ti a, police-ah pawh thawk tlak lo an tam thu a sawi.

Lalduhoma chuan, sorkarin thawktu tur a lakin hnathawh man a pe nghal ṭhin tih sawiin, "Hlawh min pek hian ei ral tur ni loin, thawk chhuak tur kan ni. Huana thawk tur chhawr ila, engmah ti lo se kan lawm lo ang," a ti.

Chief Minister chuan sorkar hnathawk, thawk thei tawh lote chu chawlhtir ngai kher loa mahnia insaseng turin a chah a, "Lo inruahman se a ṭha khawp ang. Ṭha takin voluntary-a chhuah theih a ni," a ti a, an hmun ruakah ṭhangthar ṭha zawk lak theih a nih dawn thu a sawi.

Police hna chu taksa leh rilru hrisel neite thawh chi a nih avangin physical test paltlang a ngai tih sawiin Lalduhoma chuan, "Luh hnuah training hautak tâwk tak neihpui leh an ni. Service hnuah pawh ngaih pawimawh zui zel niin, Sports Meet pawh hian chu chu a tum a ni," a ti.

Sport Meet hawnna hi Home minister K Sapdanga pawhin a hmanpui a; DGP Anil Shukla-a'n inlawmna thu a sawi.

Mizoram Police Sports Meet-ah hian Mizoram Police-te chu hlawm 13-ah an inṭhen a, police infiammi 1,200 chuang telin, infiamna chi 18-ah an intihsiak dawn. December 13, 2024-ah Home Minister hoin kharna hun hman a ni ang.