TB '100 Days Campaign' hawn a ni; 2024-ah TB vei 2,164 hmuh a ni tawh

Ngawr (tuberculosis) natna ni 100 chhung do beihpui thlâkna, '100 Days Campaign' chu nimin khan minister of state B Lalchhanzova'n Hospital and Medical Education auditorium-ah a hawng. Kumin 2024 chhungin Mizoramah ngawr (TB) vei mi 2,164 hmuh chhuah a nih tawh thu tarlan a ni.

Hawnna inkhawma tarlan danin, January-December 9, 2024 thlengin Mizoramah TB vei rinhlelh mi 24,017 endik tawh niin, chu'ng zinga mi 2,164 chuan an vei tih hmuh chhuah a ni a; TB vei enkawl zinga 80% chu an dam tawh laiin, mi 147 an thi thung.

B Lalchhanzova chuan, 100 Days Campaign a hlawhtlin theih nan sorkar department te, kohhran, tlawmngai pawl leh khawtlang an ṭanrual a ṭul sawiin, "Sorkar hmalakna apiangah mipui dah pawimawh ber tur a ni a, TB dona atana hmalaknate hi mipuiin a ṭangkai thei ang berin hmang se a duhawm. Mizoram hi hriselna lamah kan him lo a, ralmuang taka awm mai mai thei kan ni lo," a ti a; TB donaah sorkar thawhpuia pên chhuak turin mipui a sáwm.

Hawnna inkhawm hi Health secretary Sangchhin Chinzah-in a kaihruai a, kum 2025-a India ram aṭanga TB ûmbo tura sorkar laipui hmalaknate a sawi. National Health Mission mission director Dr Eric Zomawia pawhin thu a sawi a; kalkhawmte'n TB ûmbo tura intiamna an sawi rual bawk.

HFW principal director Dr Vanlalsawma'n TB vei mi 150 chhawmdawl mektu North Eastern Development Finance Corporation Ltd., minister B Lalchhanzova leh HFW secretary Sangchhin Chinzah te hnenah chawimawina a hlan.

100 Days TB Campaign hi nimin vek khan Champhai, Serchhip leh Mamit district-ahte pawh hawn a ni.

100 DAYS TB CAMPAIGN

• Campaign hi March 24, 2025-a World TB Day thleng tur pualin sorkar laipuiin a kalpui.

• Campaign-in a tum ber chu ni 100 chhunga TB vei a tam thei ang ber hmuh chhuah leh enkawl a ni.

• TB natna kai awlsam bik - upa, zunthlum, zu ngawl vei (acoholic), mei zu ṭhin leh HIV positive-te a bitum bik.

• Campaign hnuaia TB vei hmuh chhuahte chu a thlâwnin enkawl an ni dawn.