Chief Minister-in hlawh la tlai an awm ṭhin chhan a sawifiah

Finance changtu chief minister Lalduhoma chuan, sorkar hnathawk zinga hlawh la tlai an awm ṭhin chhan a sawifiah a, "Finance department mawhphurhna a ni ngai lo," a ti.

Nimina Mizoram Police Sports Meet a hawnaah Chief Minister chuan, officer-te'n an naute welfare ngaihsak deuh deuh se a duh thu a sawi a, "Hlawh tlem têtê hlawhte'n hlawh la hmasa rawh se, rawn tichak rawh u, pek hmasak ni rawh se. Central aṭanga sum lo kal ṭhin chi a nih pawhin state sumin kan pe ang a, kan dawn hunah kan rûl leh mai ang tia kan chah hi an tam lutuk," a ti.

Chief Minister chuan, an innawr chung pawhin hlawh tlém zawk leh hlawh pawh ni chiah lo, lawmman la ṭhinte chu a huna hlawh la lo, la hnuhnung zawk, thla eng emaw zat hlawh la loa an awm fo ṭhin thu sawiin, "Finance department mawhpuh an ni fo. Kan en chian hian Finance mawhphurhna a ni ngai lo," a ti a, department lamin an thehluh tlai vang a nih ṭhin thu a sawi.

CM Lalduhoma chuan, sorkar department zingah an naute, an hnuaia thawkte tana che vat vat ṭhin awm a nih laiin, ti vat vat tura hrilh nawn ngai officer an awm fo thu a sawi a, "Hetiang officer an awm hi Pathian nen kan inkar, thlarau lam nunah pawh a dik lo tih a chiang," a ti bawk.