Sorkar hian a intiam ang ngeiin leisak rawh se - MNF Vice President
Mizoram Assembly House-a opppsition leader Lalchhandama Ralte, MNF vice president chuan, ZPM sorkar chu an intiam ang ngeia kut hnathawktute thlai thar lei tur leh thlai leina hmun bik siam lo a, thingtlang khaw tina lei turin a phût.
Lalchhandama Ralte hian nimin khan Mizo Hnam Rûna inkhawmah thu sawiin, "Kut hnathawktu thawkrim tak takte thawh rah ang ang hi sorkar hian a intiam ang ngeiin leisak rawh se. An intiam ang ngeiin hmarcha, sawhthing, aieng leh hmunphiah lei rawh se," a ti.
Kut hnathawktute thar ang ang a leina tur rate an sawi anga lei tura sorkar phûtin Lalchhandama chuan, "January aṭanga May chhung chauh thlaite lei an tum leh si hi kut hnathawktute hmuhsitna a ni," a ti a; sorkar laipuiin thlai 24-ah kumtluana support price a pe angin kumtluana support price pe ve turin Mizoram sorkar a phût.
MNF Vice President chuan, loneitute'n thlai an thar ṭan a, an thlai tharte chu Krismas thawmhnaw lei nan te, kohhran thawhlawm atante Krismas hma ngeiin hralh an duh nia sawiin, "Chutiang a nih laia kum thar lam daiha lei an tum hi a dik lo. Transport subsidy siam si loa collection center tlem azawng chauha thlai thar lei an tum hi a dik lo a, thingtlang khaw tinah sorkar hian lei rawh se," a ti.
ZPM sorkar chu Mizoram ro hlu hrang hrang hralh tur an zawng nasaah puhin Lalchhandama chuan, "MNF chu na zawka che turin kan inpeih a ni," a ti. MSSB ṭhiah leh MPSC chungchang sawiin, "Politics-a phuba lâk nan MSSSB an ṭhiat a, MPSC kan thuam ṭha ang, an ti a, an thuam ṭha ta em? MPSC-ah hian sorkar a inrawlh thûk lutuk nge an hming hliau nasa ta hle," a ti a; rintlak taka MPSC kaltir turin sorkar a chah.
Lalchhandama Ralte chuan, ZPM sorkar chu hnam thilah MNF leh Congress aṭangin inzir tura chah a, "Hnam thil a awmin opposition-te hian sorkar kan thawhpui ṭhin. All NGO leh all party anga hmalakna tur thilah anmahniin an duh duhin thil an ti ṭhin hi a fuh lo," a ti a; ZPM sorkar chu an sawi loh ang hlirin an awm nia sawiin, sorkar hnathawk leh kut hnathawktuteah an tlahniam nasa niin a sawi bawk.