MST bus 26 tlantir mek a ni; Tripura-a MBS bus tlan titawp rih

Transports department chuan Mizoram State Transport (MST) bus 26 an tlantir mek a; hetih lai hian, Tripura-a MST bus service an tihtawp rih.

Vanglaini palai zawhna chhangin Transport department hotute chuan, MST bus 26 an neih thu sawiin, "Chung zinga 23 chu Aizawlah a awm a, pahnih chu Lungleiah awmin, pakhat chu Siahaah a awm," an ti.

Transport department hotute sawi danin, Lungleia MST bus awm chu Aizawl leh Lunglei inkarah an tlan ṭhin a, Siahaa awm chu Siaha leh Aizawl inkarah a tlan thung. Aizawla awm 23-te chu khua/kawng pasarihah an tlan ṭhin.

Hetih lai hian, Zo hnahthlakte inpumkhatna atana Tripura-a MST bus tlantir ṭhin chu kawng a ṭhat tâwk loh avangin kumin fûr lai vel khan tihtawp rih a ni a, kawng a ṭhat hunah tlantir leh tlantir loh ngaihtuah ṭhat leh a ni dawn.

Tahan, Myanmar thlenga bus tlantir tumna chu External Affairs Ministry thuneihna a nih thu sawiin Transport department hotute chuan, "External Affairs Ministry lamah ngen­na thawn a ni a, an la reh rih," an ti a; Myanmar ram dinhmun avangin bus tlan­tir chi a ni rih loa an ngaih thu an sawi bawk.