Ṭhelrêt chíngtute ṭanpuina hlân an ni

Land Resources, Soil & Water Conservation (LRSWC) minister R Lalzirliana chuan, Aizawl district-a ṭhelrêt chíngtu chhungkaw 90 hnenah ṭhelrêt sâwngbàwlna kháwl 'rubber rolling machine' leh a kaihhnawih hmanraw dangte nimin khan a hlân. Hmanruate hi LRDWC department-in subsidy-a a pek a ni.

LRSWC pisaa khawl semna inkhawmah R Lalzirliana chuan, Mizote'n ṭhelrêt an hmelhriatna rei tawh mah se, a chi ṭha an chìn loh vang leh enkawl dan thiam loh vangtein a hlâwk lo tih a sawi a, "Department-in hmangcháng hriain tunlai thiamna leh a chìn dan turte zira an buaipui hnuah ṭhelrêt hi eizawnna tlak a ni tih kan hre ṭan a, chíngtu pawh an pung mek. Sorkar chuan an tan kháwl leh a urna in (smoke house) sakna turte a ngaihtuahsak a ni," a ti.

LRSWC Minister chuan, sorkar aṭanga ṭanpuina dawnga ṭhelrêt chíngtu chhungkaw 2,927 an awm thu sawiin, "Sorkar puihnaa innghat loa mahni kutkawiha ṭhelrêt buaipui chhungkua an tam zawk a, an entawn tlak hle. Mizorama ṭhelrêt sàwr chhuah chu Tripura aiin a ṭha niin mithiamte'n an sawi," a ti a; ṭhelrêt chu a tìr lam kum 7/8 vel enkawl ngai mah se, a hnuah chhungkaw châwmna a nih theih thu a sawi.

Rubber rolling machine leh a chhawm tel bungrua dawngtute hian kháwl manah Rs. 10,000 ṭheuh an tum ve a ni.