Thlai kan lei ngei dawn - Agriculture Minister

Agriculture & Farmer Welfare minister PC Vanlalruata, State Marketing Board chairman ni bawk chuan nimin khan ZPM pisaa inkhawmah thu sawiin, inthlan campaign laia ZPM auhla angin kut hnathawktute thlai thar an lei ngei dawn a, mipui tihbeidawn an tum loh thu leh, Mamit leh Kolasib district-ah buhhûm lei an tum thu a sawi.

PC Vanlalruata chuan, "Mi ṭhenkhat chuan thlai thar hi lei thei lo ila, mualpho takin sorkar hi awm se an duh emaw tih mai turin min châng reng. Mahsela, Pu Lalduhoma kaihruai ZPM ministry hian thlai thar kan lei ngei dawn a, mipui tihbeidawn kan tum lo," a ti.

ZPM-in campaign laia an lo aupui tawh angin thlai pali - sawhthing, aieng, hmarcha leh hmunphiah lei turin Marketing Board an din tawh tih sawiin Minister chuan, "Marketing Board hian chak takin hma a la mek," a ti a; tun hnaiah International Conclave cum Buyer Seller Meet an buatsaihah India ram chhung leh pawn aṭangin thlai thar ngaihventu an lo pung khawm thu a sawi.

PC Vanlalruata chuan, district tinah Agriculture Marketing Committee an din tawh thunleh khaw tinah society 800 dáwn an din tawh thu sawiin, "Sawhthing leh Aieng hi January-May thleng sorkarin a buaipui dawn a, hmunphiah leh hmarcha bikah January-March chhung sorkarin market a buaipui dawn," a ti.

Agriculture Minister chuan, "Khaw tina society kan dinte hi primary collection centre-ah puan a ni dawn a, anmahnia auction an tih theih chuan sorkar inrawlh kher ngai loin anmahni society-in an hralh dawn a, sorkar rate anga leisaktu an hmuh loh erawh chuan secondary collection centre khaw 45 kan puan tawhah an rawn hralh dawn. Primary collection centre aṭanga secondary collection centre thleng thlai thar phurh man chu society-in an buaipui dawn a ni," a ti a; sorkarin thlai lei leh hralh dan mumal taka kalpui a tum thu a sawi.

Thlai chhêk khâwlna hmun wholesale market hmun pahnihah an din dawn thu sawiin Minister chuan, "Sihphir leh Melthumah din turin hma kan la phawt ang a, a intahtawl zelin thlai thar dahṭhatna tur leh wholesale-na tur hmun kan buatsaih mek. Kut hnathawktute harsatna sutkian zel hi kan tum a ni," a ti.

PC Vanlalruata chuan, buh leh bâla Mizoram a intodelh a, ram a dinchhuah theih nan hma an lah thu sawiin, "Kan hma lawkah hian Mamit leh Kolasib district-ah buhhûm lei ṭan kan tum," a ti a; an tum anga kan kal theih chuan kum 2028 inthlanpuiah hahdam takin mipuiin sorkarna an pe leh mai tura an ngaih thu a sawi bawk.