Engkim chàn huama ram rawngbawl tura pên chhuak kan ni - Lalthansanga

Minister Lalthansanga chuan, ZPM danglamna chu mahni aia ram an dah hmasakna vang a nih thu leh engkim chàn huama ram rawngbawl tura pên chhuak an nih thu a sawi.

Lalthansanga hian nimin khan ZPM Aizawl East I-in Muanna Veng community hall-a political training an buatsaihah thu a sawi a, "ZPM kan danglamna chu, mahni aia ram kan dah hmasakna hi a ni. ZPM-a kan tel hian engkim chàn huamin ram rawngbawl turin kan pên chhuak a, he kan inpekna hi Pathianin mal a sàwm niin kan hria a ni," a ti.

Mipuiin party sorkar an nin tawh thu sawiin Lalthansanga chuan, "Mipui sorkar siam an duh a, chutah chuan beiseina sang tak neiin ZPM kutah rorelna an dah a ni. Campaign laia kan au hlate leh kan policy-te tihlawhtling turin theihtawp kan chhuah reng a, nghet takin kan la ding reng a ni," a ti a; kum khat chhung sorkarna an chelh tawhah eiruk vanga hmingchhia an la awm loh thu a sawi.

Lalthansanga chuan, ZPM worker, therhlo beiseia minister-te chîm buai hriat tur an awm lo nia sawiin, "Kalphung tharin a hrin chhuah niin a lang a, kan lawm hle. Kan hna a ṭha tur a ni tiin kan infuih nasa a, kuttlingloa hnathawh a awm chuan action kan la nghal zel dawn, a ti a; ZPM member-te chu hnungtawlh lo a, huaisen takin rinawmna nen hmun kal turin a chah a ni.