Lungleiah World AIDS Day hman a ni

Mizoram State AIDS Control Society (MSACS) leh Lunglei District AIDS Prevention & Control Committee (DAPCC) huaihawtin nimin khan Lungleiah World AIDS Day hman a ni a, Health & Family Welfare minister Lalrinpuii'n hmanpuiin, kawngzawh leh inkhawmin hun hman a ni.

World AIDS Day pual kawngzawh hi Lunglei High School tualah ṭanin, Convention Centre thleng an kal a, zirlai ṭhahnem tak telin, Health Minister-in a vailiam. Kawngzawhah hian HIV/AIDS dona leh fimkhurna tur bakah, a veite enkawlna leh dikna chanvo inzirtirna thuziak hrang hrang an keng.

Lunglei Convention Centre-a inkhawmah Lalrinpuii chuan, HIV vei hmuh chhuah tawh zinga 93% aia tam zawk chu invenna tel loa mipat hmeichhiatna hman aṭang leh hriau leh inchiuna hmanraw thianghlim lo inhman ṭâwm aṭanga kai an nih thu a sawi a, "Hei hian HIV hi inkai chhâwn theih ni mah se, invên theih a nihzia a tichiang," a ti.

Lalrinpuii chuan ruihhlo chu ram, chhungkua leh mimal hmelma a nih avangin ti chhin lo tura mipui a chah rualin, ti tawhte chu sim turin a fuih a, "HIV kai tawhte'n ṭha taka inenkawlna damdawi an lak a, chatlak miah loa ART damdawi an ei a pawimawh," a ti a; HIV veite chu mi dang hnena kai lo tura fimkhur turin a ngen.

Health Minister chuan, HIV/AIDS dona leh a veite enkawlnaah sorkarin theihtawp a chhuah thu a sawi a; HIV darh zel tur vennaah theihtawp chhuah turin mi tin a sáwm bawk.

Lungleia World AIDS Day hmanna inkhawm hi Lunglei bawrhsap Navneet Mann-i'n a kaihruai a; ruihhlo laka fihlim tura intiamna leh HIV/AIDS do tura intiamna signature campaign buatsaih a ni.

World AIDS Day hi December 1 a ni a, kumina thupui chu 'Take the rights path: My health, my right' (Dikna kawng i zawh ang u: ka hriselna, ka chanvo) tih a ni.

HEALTH MINISTER THUSAWI DANGTE

• Kum 1990 aṭangin Mizoramah HIV vei mi 28,028 an awm tawh.

• Kum 2023-24 chhungin HIV kai hmuh chhuah thar mi 2,059 an awm.

• Lunglei district-ah (Hnahthial district telin) January-October 2024 chhunga thisen endik 4,997 zingah HIV vei mi 99 (1.98%) hmuh a ni.

• Mizoram chu India ramah HIV inkai chhâwn theihna leh invenna kawng hriatna lama sang ber pawl a nih laiin, mihring cheng zat aṭanga chhûta HIV vei tamna ber state a ni.

• HIV inkai chhâwnna tam ber mipat hmeichhiatna lama nun invawn thianghlim hi mimal duhthlanna a ni a, kan invawn thianghlim a ṭul.

• Invawng thianghlim thei lote'n invenna hman uar a pawimawh a, hriau/inchiuna hmanrua tu mah ṭâwm loh tur.