CM-in ṬBCC hnenah cheng nuai 5 a pe

Chief minister Lalduhoma chu December 8, Pathianni chawhnu khan Sakawrtuichhuna Ṭawngṭai Bethel Camping Centre (ṬBCC)-ah a inkhawm a, Krismas leh kumthar an lawmna atan Rs 5,00,000 a hlan. CM chuan, home hrang hranga sorkarin buhfai a pek ṭhin tihpun an rilrûk mek thu a sawi.

CM Lalduhoma chuan, home-a enkawl ngai chu tlem tial tial se an duh laiin an pung zel tih a sawi a, "Mizorama home hrang hranga enkawl mekte tan sorkar chuan buhfai kg khat Rs 6 anga chhûtin thla thum danah quintal 6,636 vel a pe ṭhin a, a man a tlawm êm avangin han tihsan hlek a, mihring pek zat tihpun kan rilruk mek. Tuna kan pek mek hi mi 14,788 tana chhût a ni a, buhfai pek chhuah zat hi tihpun a ṭul hmel," a ti.

ṬBCC-a awmte chu thuawihna hlutzia hre tura chahin Lalduhoma chuan, "Home enkawltute thu awih u la, ram nuam zawk panin thlalerah in thang mek a ni. In nu leh pate'n an hmangaih che u tih hi ringhlel ngai suh u," a ti a; mahnia an din theih nan home-ah hotute'n an tuaihriam a ni tih hre turin a chah.

Chief Minister chuan, mihringte'n thil thuhmun rfeng an dawnsawn dan a inang lo fo tih sawiin, "Ṭhenkhatte'n dam dapa an hmachhawn theih laiin, mi dangin hrehawm ti takin an lo hmachhawn ṭhin a, an rilru sûkthlêk dik loh vang a ni," a ti a; rilru hrisel tak pu tur leh chhungkua leh khawtlang tana mi ṭangkai nih tum turin a chah bawk.

ṬBCC-ah hian mi 1,270 vel an awm mek a, Chief Minister hi adviser to CM TBC Lalvenchhunga, bialtu MLA-in a ṭawiawm. Inkhawm hi ṬBCC hotupa TT Zohmingthanga'n a kaihruai a ni.