MCS recruitment 'stay' mah se Combined Exam a kaltlang dawn

MPSC chuan Gauhati High Court, Mizoram Bench-in Mizoram Civil Service (MCS) lakna kalpui rih lo turin Mizoram sorkar leh MPSC hriattir mah se, Combined Competitive Examination 2015-a preliminary exam, June 19, 2015-a ṭan tur chu a kalpui tho dawn.

Thu dawn danin, Taxation department-a inspector C Lalṭhazuala chuan April 2015 tìr lam khan Gauhaiti High Court-ah petition a thehlut a; Mizoram sorkarin kum 2011-12 leh 2012-13 chhunga departmental promotion-a MCS-a lut turte post a hup bet a, promotion-a MCS lut an awm loh laiin, direct recruitment hmangin MCS-ah mi eng emaw zat an lut tawh niin a tarlang a ni.
Vanglaini palai zawhna chhangin C Lalṭhazuala chuan, kum 2011-12 leh 2012-13 chhunga departmental promotion-a MCS-a lut turte post awm zat chu pariat nia an chhût thu a sawi a, "Sorkarin min dang rei tawh a, kum 2013-ah sorkar kan khing tawh a, June 2014-ah Court-in judgement a siam tawh a, mahse judgement chu sorkarin a zawm loh avangin kan chanvo humhim nan kumin April thla tir khan Court-ah kan kal leh a ni," a ti.
Thu dawn danin, C Lalṭhazuala petition thehluhah hian High Court chuan kumin April 10-ah Mizoram sorkar chu May 5, 2015 hmaa insawifiah turin a ti a; mahse Mizoram sorkar (DP&AR) chu Court-ah a insawifiah lo. Chuvang chuan High Court chuan kumina MCS lakna tur kalpui mek chu titawp rih turin a hriattir ta a ni.
MPSC chairman Andrew Lalherliana chuan Vanglaini palai zawhna chhangin, High Court order chungchang chu an legal council-in an buaipui thu a sawi a, "MCS exam hi kaltlangpui turin beiseina kan la nei a ni," a ti.
MPSC secretary Tamlal Lohar-a'n Vanglaini palai a hrilh danin, MPSC Combined Competitive Examination 2015 chu an kaltlangpui tho dawn a; sorkarin High Court order a chhan lêtna aṭanga High Court-in order a siam tawh chu a sût a nih chuan MCS recruitment chu a kaltlang ang a, order sût a nih loh erawh chuan MCS bik chu Combined Competitive Exam-ah a tel rih lo mai dawn a ni.
Zawhna chhangin Tamlal Lohar chuan, kumin tir lamah MPSC-in departmental promotion-a MCS-a lut tur lakna (recruitment) an neih thu a sawi a, "Kum 2010-11 vacancy hnawhkhahna tura lak a ni a, mi panga lak an ni," a ti.
MCS lakna leh High Court order chungchangah hian DP&AR secretary V Lalremthanga chuan, High Court order chu departmental promotion hmanga MCS-a lut tur leh post awm dante chinfel a nih hma chuan MCS la rih lo tura hriattirna a nih ber thu leh, hearing neih leh hun tur chu June 29, 2015 a nih thu a sawi.
V Lalremthanga chuan, High Court order chhan lêtna tur an ukilte'n an buaipui mek tih sawiin, "A hma pawhin writ petition a lut tawh a, chumi chhanna ni pah chuan miscellanous petition kan thehlut ang a, order hi sut turin kan dil ang," a ti a; Combined Competitive Exam chu June 19, 2015-ah prelims exam ṭan a nih tawh dawn avangin kar lehah thehluh hman an tum thu a sawi.