St. Paul's HSS-in zirlai tiṭhate lawmpuina hlan

St. Paul's Higher Secondary School chuan nimin khan an school auditorium-ah kumin HSLC leh HSSLC-a top 10-a tlingte leh subject mala mark hmu sang berte chawimawina hun, 'Paulians’ Proficiency Award 2015' an hmang a, Rajya Sabha MP Ronald Sapa Tlau-in a hmanpui.

Ronald Sapa Tlau chuan, zirlai ti ṭhate chu a lawmpui thu sawiin, "St. Paul's HSS hi mi hlawhtling tam tak lo chherchhuak tawhtu a ni. Hlawhtling tur chuan mahni inrintâwkna leh thawhrimna a pawimawh ber," a ti a; zirlaite chu ram leh hnam tana mi ṭangkai ni turin zirlaite a chah. Rajya Sabha MP hian St. Pauls HSS magazine ‘Paulian Waves 2014-2015’ a tlangzarh a ni.

Khualzahawm, MBSE chairman Rev. Dr. Lal­chungnunga chuan, MBSE-in mark a ren nia sawi awm ṭhin chu thu dik a nih loh thu a sawi a, "A thiam chuan mark ṭha tak tak an hmu ṭhin a ni," a ti.

St. Paul’s HSS hian HSLC 2015-ah pahnihna, parukna, pariatna, pakuana leh 10-na an nei a; English, Mathematics, Science, Social Sciences leh Hindi subject-ahte mark hmu sang ber an nei.

HSSLC 2015-ah Commerce-ah pathumna an nei a; Science-a top 10 zinga palina tih loh chu an sikula mi vek an ni. Chemistry, Physics, Biology leh Computer Science subject-ahte mark hmu sang ber an nei bawk.