Gilead Special School hmun thar lawm

Spastic Society of Mizoram (SSM)-in a enkawl, Gilead Special School chuan nimin khan Bawngkawn Brigade rama an puala hmun nghet an neih lawmna an buatsaih a, chief minister Lal Thanhawla'n a hmanpui.

Chief Minister chuan, Gilead Special School-in an puala hmun an nei thei chu a lawmpui thu sawiin, "Spastic Society of Mizoram hi rualbanlote enkawlnaah Pathiana innghat chung zela an kal avangin Pathianin mal a sawm a ni. Ringtu kan ni a, kan awmna apiang hi Pathianin a rawngbawl tura min dahna a ni a, tui taka thawk tur kan ni. Mi dangte tana malsawmna ni turin kan thawh a ngai," a ti.

Rualbanlote chu Pathianin a duh taka a siamte an ni tih sawiin Lal Thanhawla chuan, "Rualbanlote hi Pathian vohbikte an ni. Kan chunga thil thleng reng reng hi Pathianin kan chungah eng emaw tih duh a neih ṭhin vang a ni," a ti a; sikul leh naupangte enkawltu zawng zawngte inpekna leh an hnathawh chu fakawm a tih thu sawi.

Gilead Special School atana sorkarin ram a pek hi bigha 3.5-a zau a ni a, Falkland Venga an sikul ṭhiatin, March 2, 2015 aṭang khan Brigade ramah hian in pasarih sak a ni. Class room 18 awmin, hostel naupang 30 len theihna tur sak mek a ni bawk.

SSM hi kum 1989-ah din a ni a, kum 25 an kal chhungin Aizawl veng hrang hrang - Chhinga Veng, Sikulpuikawn, Saron veng leh Falkland Vengahte an awm kual tawh a ni.