KHAWTHLIR

Delhi police
Mizoram police chuan thuchhuah siamin, July 2015-ah Delhi police-a ṭang turin Mizoram aṭangin mipa leh hmeichhia panga ve ve lak tum a nih thu an puang. Delhi police-a ṭang duh tan district SP office tinah zawhfiah theih a ni a, mipa kum 18-21 leh hmeichhia kum 18-25 tan dil theih niin, tribal-te chu kum nga ngaihhnathiam theih an ni.

MDEE result
Higher & Technical Education department-in Mizoram Diploma Entrance Exam 2015 a buatsaih result chu nimin khan a chhuak a; interview hmachhawn turin exam beitu mi 450 zinga mi 250 an tling niin H&TE hotute'n Vanglaini an hrilh.

Heroin man
Champhaia Excise & Narcotics department hnathawkte chuan nimin chawhnu dar 2 khan Champhaiah heroin gram 29 an man a; a neitu Laldinthari (280 d/o Zalianthanga leh Lalsawimawii (24) d/o Bawihhlunchhunga, Khawmawi, Myanmar ve ve nia insawite an man bawk.

ADFA meeting
Aizawl District Football Association (ADFA) chuan nimin khan Tourist Lodge, Chaltlangah Annual General Body Meeting an hmang a, minister PC Lalthanliana'n a hmanpui.

Kawng khar dawn
Aizawl Traffic SP chuan thupek chhuahin, Upper Khatla-a Minor Irrigation department office bul kawngpuia culvert pawp chu hmanhmawh taka siam a ṭul avangin vawiin chawhma dar 10 aṭangin he kawngpuiah hian lirthei zawng zawng kaltlang phal a ni dawn lo tih a tarlang.

Túr hman khap
Serchhip DC Juhi Mukherjee chuan thupek chhuahin, June 3, 2015 aṭanga thla hnih chhung Serchhip district chhungah dynamo leh túr hmanga luia sangha man khap a nih thu a puang.