Kohhrante'n zu aiin vaihlo do zawk se - CM Lal Thanhawla

Chief minister Lal Than­hawla chuan zu cho do rem chi a ni lo niin a sawi a, kohhrante chuan zu aiin zuk leh hmuam do zawk se ṭhaa a hriat thu a sawi bawk.

Nimina Congress Bhavan-a inkhawmah thu sawiin, Lal Thanhawla chuan, kohhrante chuan MLTP Act hman laiin zu leh zu zuarte do si loin, MLPC Act hman a nih veleh zu leh zu zawrh an do ta niin a sawi a, "MLTP Act kha a hlawh­chhama, sorkar chuan kohhrante râwn lo mah se, Pathian leh mi thiamte râwnin kal dan tur a ngaihtuaha, khuahkhirh chunga phalna neia zawrh chu ṭha bera a hriat avangin tunah hian a enchhin a ni," a ti.

Lal Thanhawla chuan, kohhrante'n MLPC Act hman hnua zu leh zu zawrh an do angin MLTP Act hman laiin do se chuan zu do kawngah sorkar a hlawhtlin a rin thu a sawi a, "Zu hi do rêm chi a ni lo a, khawvela sorkar chak ber US sorkar pawhin do hneh loin an danpui an siam ṭha a ni," a ti.

MPCC President chuan, zu khap bur hun lai khan Phunchawng leh Rangvamualah zu a tam hle tih sawiin, "Tuna dote hian heng veng pahnihah hian an do kan hre lo a, sorkar thil tih hrim hrim an dodal nia ngaihtuah a awl rum rum a ni," a ti a; kohhrante chuan zu aiin zûk leh hmuam do zawk se ṭhaa a hriat thu sawiin, vaihlo leh a kaihhnawihte chu kohhran ṭhenkhatin an do laiin, kohhran pawl ṭhenkhat chuan engmah an ti loa a lan thu a sawi bawk.

Aizawl Municipal Council inthlan tur chungchangah Lal Thanhawla chuan, eptute'n hmeichhe bial tur tichiang thuai turin State Election Commission an nawr niin a sawi a, SEC chu political party-te inrawlh lohna tur a nih thu a sawi.