Kaskau-a Bru-te lâk lêt theih an ni lo

Mizoram sorkar thuchhuah chuan, June 2-4, 2015 chhunga Kaskau camp-a Bru-te Mizorama let tura endik tumnaah endik tura inlan an awm loh avangin June 8, 2015 aṭanga Kaskau camp-a Mizoram Bru-te lak let hna chu kalpui theih a ni dawn lo tih a puang.

Sorkar thuchhuah tarlan danin, Kaskau-ah inenfiahtir an awm loh avangin Mizoram mi endik tawhte Kanhmun Facilitation Centre-a lo hmuak tura ruahmanna pawh kalpui theih a ni dawn lo a; chutih rualin, ruahman sa angin endiktu tura ruat (identification team)-te chuan June 15-18, 2015 chhungin Khakchangpara camp-ah endik hna an thawk leh ang.

Bru-te chu lâk let an nih hmain Mizoram mi an nih leh nih loh endik vek phawt tur a ni a, Bru lak let hna chu a pumpuiin September 2015-ah zawh hman tura ruahman a ni.