HM Zira'n Zo nun mawi zir tel turin a chah

Home minister R Lal­zirliana chuan, Mizo zirlaite'n lehkhathiamna chauh neih an tum chuan Mizo nun ze mawi an hloh a hlauhthawnawm thu a sawi a, "Mizo zirlaite tan lehkha zirna bakah, Zo nun mawi an zir tel a ngai a ni," a ti.

Home Minister hian nimina Saitual Higher Secondary School-a MZP sub-hqrs. Saitualin an huam chhunga kum­in HSLC leh HSSLC-a zirlai hlawhtlingte a lawmpuinaah thu sawiin, "Zo nun mawi hi tunlai naupangte hian zirlai an nih chhunga an tih theih leh an tih atana thil mawi tak a ni," a ti a; tlawm­ngaihna nei, aia upate zah nachang hria leh chhumchhiate ṭanpuina kawnga mawngzâng nih tum turin zirlaite chu a fuih.

R Lalzirliana chuan, eizawnna kawng hrang hrangah lehkhathiam a pawimawh tih sawin, "Pawl sawnna ringawt thiam­na a tâwk lo a, khawi hmun pawha hlawhtling tur chuan export quality tih theih khawpa thiamna nghet neiha pawimawh," a ti.

Sorkarin a duhsak zawng sorkar hnaah a thun anga sawi ṭhin chu a dik lo tih sawiin, R Lalzirliana chuan, sorkar chuan a thiam thiam a lak ṭhin thu a sawi a, "Eng emaw vanga duhsakna hleihluak taka hmanga sorkar hna pek a nei lo," a ti.

Mizo ṭhalai chhuanvawrte zingah hnam dang nupui/pasal atan neih ṭha tihna rilru nei an awm ṭhin nia sawiin, vanduai­thlak a tih thu a sawi a, "Mizo hnahthlak tam tak zingah hian nupui/pasal atan duh thlan tur tam tak an awm. Zo hnam péng hrang hrangte hi inneih pawlh chíng zawk ila, hnam dang ngaihsan ai chuan Mizo hnam tan a ṭha zawkin a rinawm," a ti. Mizo hnam hmangaihna thinlung pu turin zirlaite chu a chah a ni.