Buhfaiah kan dinhmun a ṭha: Supply Minister

FCSCA minister John Rotluangliana chuan, buhfaiah Mizoram din­hmun a ṭha niin a sawi a, "Buhfai quintal 1,40,000 kan nei a, POL (tuialh­thei) leh gas lamah harsatna a awm lo," a ti.

Nimina Lunglei Cong­ress Bhavan-a inkhawmah thu sawiin, John Rotluangliana chuan, October 1, 2015 aṭangin mega block awm mahse tun thlengin Mizoramah buhfaia harsatna a awm lo niin a sawi a; Mizoramin buhfaia harsatna a tawh loh nan nasa takin ṭan an la a, FCI pawhin an buhfai lei turin Mizoram sorkar an rawn be zawk niin a sawi.

Supply Minister chuan, kumin tir aṭanga APL buhfai man tihto chu thil man pun chhoh dan enin, a âwm tawk hle niin a sawi a, "Mizo mipui tam ber hian an pawm a, FCI thlang loa local supplier aṭanga buhfai kan lei hian thla tin cheng vbc. 7 vel sorkar pawisa kan hum thei a ni," a ti.

Zu zawh chung­changah John Rotluang­liana chuan, "Sorkarin zu a zuar lo a, a permit kan pe mai a ni," a ti a; Mizo hnam siam ṭhat a ngaih avangin huaisen takin sorkarin ruahmanna a siam nia sawiin, "Ram inrêlbâwlna hrim hrimah CM Lal Thanhawla’n kan ram leh hnam a hruaina hi a la him tawk a ni," a ti.