Larsapin MZU-ah NECS Conclave a hawng

Mizoram University-a Department of Management leh North Eastern Consultancy Services (NECS) ṭangkawp chuan nimin khan MZU-ah 'NECS Human Resource Conclave' an buatsaih a, Governor Lt.Gen. Nirbhay Sharma-in a hawng. Governor chuan, zirlaite chu zirlaibu piah lama an nun khawchhuahna tur ngaihtuahsak a pawimawh thu a sawi.

Lt.Gen. Nirbhay Sharma chuan Mizoram aṭangin kum tin zirlai lehkhathiam an chhuak reng tih sawiin, "Eizawnna kawng dap turin an pên chhuahin sorkar hnain a daih sêng lo a, chuvang chuan zirna-inte hian zirlaibu piah lamah zirlaite dam khawchhuahna atana ṭangkai thiamna chi hrang hrang atan kawng kan buatsaihsak lâwk thiam a ngai. Mi hnuaia thawk ringawt lo a, mi dangte chhawr thei zawk tur khawpa thiamna nei tura chherchhuah kan tum a pawimawh," a ti.

Khawvel hun inher danglam ang zelin mihring thiamna chhawr ṭangkai dan leh mamawh dante a danglam zel tih sawiin Larsap chuan, "Kawng hrang hranga thiamna bik nei kan chher­chhuah tam hi kan ram hmasawnna atan leh industry hrang hrangte hmasawnna atana thil pawimawh ber pakhat a ni. Human resource chu mihring behchhan thil a nih avangin kan ni tin khawsak phung nen a inkaihhnawih lehzual bik tlat," a ti a; khua leh tui ṭha ni turin dik taka thil tih a ngai a, chu chu human resource ken tel a nih thu a sawi.

Conclave-ah hian India ram hmun hrang hrang aṭangin company hotute an tel a ni.