Zoramthanga sorkar Pathianin mal a sawm - Lalruatkima

Minister of state Lalruatkima chuan, chief minister Zoramthanga kaihhruai sorkar chu Pathianin hriak a thih a, mal a sâwm nasa hle niin a sawi.

Lalruatkima hian January 31, Zirtawpni khan Lungleia Mizo Hnam Rûn a tlawhnaah thu sawiin, Bru-te'n an duh thu ngeiin Mizoram an chhuahsan a, Mizoram tan harsatna nasa tak an siam ṭhin tih a sawi a, "Tunah Tripura-a an awm hlenna turin ruahmanna siam a ni ta a. Congress kha la sorkar ta se Central sorkar khuan Pu Hawla sorkar kha tihpui tlakah an ngai ang em? Tripura sorkar pawhin an duh ang em? A hun takah Pu Zorama sorkar hi Pathianin Mizote buaina chingfel turin a hûng chhuak a ni," a ti.

Citizenship Amendment Bill chu Mizoram mipuiin an duh lo tih sawiin Lalruatkima chuan, "Union Home Minister lo zin ṭumin Chief Minister bakah, tlawmngai pawl hrang hrangin Mizoram min âwl an lo dil a, chumi bawhzui chuan Delhi-ah Central YMA, MZP, political party aiawhte'n Home Minister an zuk hmu leh bawk. Mizoram CM, Mizoram MP leh tlawmngai pawlte nawrna a nasat em avangin CAB-ah telh loh kan ni ta a ni," a ti a; Congress la sorkar se chuan CAB laka Mizoram a âwl theihna tur an nawr chhuah a rinawm lo niin a sawi.

Lalruatkima chuan, MNF sorkar hnuah zu vanga thi an kiam nasa hle tawh niin a sawi a, "MNF sorkar hi lo ding ta lo se zu vangin engzat nge kan invuiliam leh ang? Zu vanga fahrah leh hmeithai kan tlahniam zel hi a lawmawm tak zet a ni. Pu Zoramthanga kaihhruai sorkar hi kawng hrang hrangin Pathianin mal a sawm tak zet a ni," a ti.