Sorkar department 10-ah Dân kalha sorkar hna lak a awm lo

Congress party kaihhruai Mizoram sorkar term kal mekah, December 2013 aṭanga April 2015 thleng khan sorkar department 10-ah dân kalha sorkar hna lak thar a awm lo. Hetih lai hian, sorkar department ṭhenkhatah chuan dân dang tlawhchhana hna lak a awm nual thung.

Mizoram sorkarin adver­tisement chhuah loin, dan kalha sorkar hnathawk lak leh lak loh chungchang RTI Act hmanga zawhna chhannaah, sorkar department 10-te chuan advertisement chhuah loa hna lak an nei lo tih an tarlang.
Labour, Employment & Industrial Training department chuan Employment Exchange (Compulsory Notification of Vacancies) Act 1959 no. 31 of 1959 dânin a huam loh, thla thum aia rei lo thawk tur (casual worker) lak pahnih an nei. Transport department pawhin thawktu pahnih lak an nei a, 'Special Scheme for Recruiting of 70 Peace Accord MNF Returnee and their Relatives' hmanga lak an ni.
Art & Culture, Food, Civil Supplies & Consumers Affairs, Principal Chief Conservator of Forest, Social Welfare, School Education-ahte chuan sorkar term kal mekah thawktu lak thar an awm loa tarlan a ni.
Hetih lai hian, sorkar term kal mekah tho hian Secretariat Administration Department chuan advertisement chhuah loin thawktu mi 24 an la ve thung a; chungte chu LDC paruk, DEO pathum leh Peon 15 an ni. SAD SPIO-in a sawifiah dan chuan, "MR-a kum sarih thawk tling tawh, MR Regularization Scheme hnuaia dah nghehte an nih avangin advertisement chhuah ngai loa lak an ni," a ti.
Directorate of Health Services-ah pawh advertisement chhuah loin health worker pahnih lak an ni a, chungte chu sorkar hnathawk thi tawh chhungte aiawh tura lak (compassionate ground) an ni a, dân ang taka lak an ni.
Higher & Technical Edu­cation department SPIO chuan, 'HTE department kaltlanga sorkar hnathawk tur lakah advertisement chhuah loh a awm lo," tiin a chhang bawk.