Sumdawnna lirthei hralh dawnin STA-ah permit pek hmasak a ngai

Transport department hotute chuan, sumdawn­na lirtheite chu a nei­tuin a hralh dawnin an permit chu State Transport Authority (STA) secretary hnenah an thlen hmasa tur a nih thu Vanglaini an hrilh.

Vanglaini palai zawhna chhangin Transport department hotute chuan, STA dân thar angin sumdawnna lirthei permit-te chu lirthei pakhat tan chiah pek a nih avangin lirthei hralh turte chuan an permit chu STA-ah an pe tur a ni tih an sawi a, "STA-a permit an pek hnuah lirthei an hralh chauh tur a ni. Motor zuarte'n an permit nen an zuar ṭhin a, permit hi zawrh phal a ni lo," an ti.

Thu dawn danin, commercial vehicle neitu ṭhenkhatin an lirthei tihral an duh thu chanchinbuah an chhuah avangin STA lam aṭangin phal loh a nih thu an dawng ṭhin a ni.