KHAWTHLIR

YMCA conference
Young Men's Christian Association (YWCA), Aizawl chuan Inrinni khan Enginering Officers' Club-ah Annual General Conference an hmang a, YMCA din champha vawi 171-na an lawm nghal a ni.

In saksak
Edenthar Veng Branch YMA chuan YMA Day lo thleng tur pualin Inrinni khan an venga hmeithai pakhat chenna tur in an sa. In sak hnatlangah hian an veng chhunga mistiri-te leh YMA member ṭhahnem tak an thawk chhuak a ni.

Heroin man
Central YMA hnuaia SRS-te chuan nimin zing dar 8:30 vel khan Dinthar Veng thlanmual bulah C Ngunlianchunga s/o Lalbiakchhunga, Myanmar nia insawi kut aṭangin heroin can 2 an man a, a hnuah Dinthar Venga a chenna inah heroin hawng khat tling lo deuh mansak leh a ni. SRS hian heroin leh a neitu hi Excise & Narcotics hnenah an hlan a ni.

Pa vaw hlum
Lalthlamuana, New Colony, Saiha chuan Inrinni zan dar 11 vel khan a pa Lalchhana chu an inah a vua a, Lalchhana hi a hliam tuar loin a thi. Saiha police-te aṭanga thu dawn danin, Lalthlamuana leh Lalchhana te hi an pafa chauha awm an ni a; Inrinni zan khan an inhnial a, Lalthlamuana chuan a pa chu a vaw ta a ni. Lalthlamuana hi police-in an man nghal.

Tlawngah tla hlum
Lalrinpuii (34), Bairabi chu Inrinni chhun dar 12 vel khan Tlawng luia Bulung lui chhuahah a tla nia hriat a nih avangin khawtlangin an zawng a; nimin zing dar 7:30 vel khan a thawmhnaw an hmuhna aṭanga hla vak loah a ruang an chhar. Lalrinpuii hian Tlawng luiah hian chengkawl a khawrh niin an sawi.

I&PR tihdikna
Information & Public Relation (I&PR) dept. chuan thuchhuah siamin, June 4 a SDMA meeting-a silpauline/tarpauline ṭanpuina peknaa buaipui man lak ṭhin Rs. 100 tihtawp remti nia an tarlan chu hriat sual palh a nih thu an tarlang a, "Lak chhunzawm tur tih zawk tur a ni e," an ti.