Mizoramah Maggie khap a ni dawn
Sorkar laipuiin Maggie noodle chu a him tâwk lo tih a puan avangin Mizoram sorkar chuan Mizoramah lak luh, zawrh leh hralh khap a tum a, vawiinah khapna thupek tihchhuah hman beisei a ni.
Health Services joint director (Food & Drugs) Lalsawma chuan Vanglaini palai zawhna chhangin, "Maggie hi Mizoramah chuan a endikna tur kan neih loh avangin kan endik ve chiah lo. Mahse, Food Standard & Safety Authority of India-in a him lo an tih avangin Mizoramah pawh kan khap ve dawn a ni," a ti.
Food Standard & Safety Authority of India hian Maggie noodle hi mihring hriselna atan him tâwk loa a ngaih avangin state zawng zawngte sample test turin a ti a; state tam takin enfiah tawh mah se, Mizoramah chuan endikna a awm loh avangin endik theih a ni lo. Food Standard & Safety Authority of India chuan Maggie siamtu Nestle India pawh an Maggie siam la kîr leh vek turin a hriattir a ni.
Mizoram sorkar chuan energy drink ṭhenkhat - Monster, Tzinga, Cloud 9 Pomegranade/Grape leh Akoaroma te chu Mizoram chhunga zawrh leh hralh a khap tawh a ni.