Mizoramah gas bottling plant lian zawk Din tumin thuneitute'n tan an la mek

Indian Oil Corporation (IOC) chuan Mizoramah gas bottling plant leh oil depot lian zawk siam tumin hma an la mek.

Hetih lai hian, eirawngbawlna gas tichingpentute chu chi thuma hrem tum a ni a, a tahtawlin an hmachhawn mek nia thu dawn a ni.

Vanglaini palai zawhna chhangin, IOC hotute chuan, Mizorama gas bottling plant lian zawk siam an tum chhan chu - Silchar leh a chhehvela kawngpui dan leh kawng chhiat vanga harsatna a thlen chánga Mizo mipuite'n chatlak loa gas leh oil an hmuh theih nah a nih thu an sawi.

IOC hotute leh Food Civil Supplies & Consumers Affairs department hotute chuan, Mualkhang Gas Bottling Plant chu acre 11.2-a zau a ni a, tuna IOC-in bottling plant lian zawk din a tum chuan ram acre 25-a zau a awh dawn a ni.

Gas bottling plant thar tur hian Lengpui leh Aizawl inkara hmun hrang hrangte enfiah a ni tawh a, duhthusama zau ram an la hmu thei lo. An duh ang ram an hmuh a, bottling plant lian zawk an din thei a nih chuan, Silchar-a kawng dan, kawng chhia leh chhan hrang hrang vanga Mizo mipuiin harsatna an tawh ṭhin chu a chhâwk zângkhai thei turah an ngai a ni.

IOC hotute chuan, India hmar­chhak state pathum - Manipur, Nagland leh Tripura state-ahte pawh gas bottling plant lian zawk an nei vek tawh niin an sawi a; Mizorama bottling plant lian zawk din tur hian Ministry of Petroleum pawhin phalna a pe tawh niin an sawi.

Mualkhang Bottling Plant hi Oil Industry Safety Directorate (OISD) 169 standard a ni a, bottling plant thar din an tum chu Oil India Safety Directorate (OSD) 144 standard a ni dawn a, a hma aia changtlung leh lian zawk a ni ang.

Tun dinhmunah Mualkhang Bottling Plant aṭang hian chawhrualin minute khatah gas cylinder 10 vel an thun khat hman a, truck pakhatah bûr 300 vel an phur thei tlangpui a; ni khatah truck trip 10 vel an thawn chhuak ṭhin. Mualkhang Plant hian Kolasib district tih loh Mizoram hmun hrang hrang an châwm mek a ni.

IOC hotute leh FCSCA department hotute chuan, tun hnaia truck pakuaa an gas phurh tichingpentute chu na takin an hrem dawn nia sawiin, truck driver hnam dang pasarih leh Mizo driver pahnihte chu Rs. 10,000 ṭheuh an chawitir tawh bakah, an truck-te chu an la hrênsak a ni.

Mi pakuate chu IOC aṭangin hrem an ni ve leh dawn a, hremna chi thum hmangin an hrem dawn nia sawiin, "Dan chhunga hremna na thei ang berin hrem tum an ni," an ti.