DC-in Kelkang khuaa zirlaite a ngaihven

Champhai DC H Lalengmawia hoin sorkar hotute chuan tun hnai khan Kelkâng an tlawh a; harhna thleng mek vanga zirlaite'n an zirnaa harsatna an tawh lohna tura hmalak dan tur khawtlang hruaitute leh zirirtute nen an sawiho.

H Lalengmawia chuan, zirlaite'n an inah leh­kha zirna hun an neih mumal loh avangin high school zirlaite chu ni tin chawhnu lamah darkar hnih tal an sikulah a bika zirtirna (special class) neihpui ṭhin turin zirtirtute chu a ngen a; harhna chu zirlaite tana malsawmna a nih zawk theihna turin theihtawp chhuah turin a chah.

Inkawmkhawmnaah hian harhna thleng mekin khawtlanga nghawng a neih dan kawng hrang hrangte sawiho a ni a; khawtlang nu leh pate tih theih piah lamah sorkar tih tura an beiseite Kelkang khawtlang hruaitute'n DC hnenah an lo thlen a ni.

Champhai DC hi SP Meena, Power & Electricity superintending engineer David C Zahmuaka, PHE superintending engineer Lalrammawia, RMSA deputy DPC Hualkhuma, SSA deputy DPC H Lalhminghluia leh SDEO C Lalbiak­zauva ten an ṭawiawm.