SRS-in cheng nuai 348 hû ruihhlo man tawh

Central YMA hnuaia Supply Reduction Service (SRS)-te chuan April 11, 2015-a hma an lak ṭan aṭanga tun thlengin ruihhlo Rs. 3,48,57,720 hû an man tawh a, ruihhlo kaihhnawihah min 387 an khâwm tawh bawk.

SRS hian din thar leh a nih hnuah Methamphetamine mûm 1,08,800, heroin gram 795, alprozelam strip 386, ganja kg. 4.1 an man tawh a, ruihhlo an mante hi Mizorama an hralhna ang chuan Rs. 3,48,57,720 hû a ni.

SRS-in ruihhlo kaihhnawiha mi an man khawm 387-te zinga 14 chu magistrate hriatpuiin home-ah dah an ni a; police hnena hlan mi 14, Excise & Narcotics hnena pek mi 11 leh Child Welfare Committee hnena hlan mi pahnih an awm.

Central YMA chuan ruihhlo dona kal zelah August 4-24, 2015 inkarah Mizoram Synod nena ṭangkawpin ruihhlo tite pualin gospel camping buatsaih an tum a ni.