Khawthlangtuipuia marboat enkawl nan Thla tin Rs. 80,000 vel an hmang ṭhin

Tlabung bul Serhuan kài aṭanga Khawthlangtuipui ràl lehlama khaw hrang hrang pan tur lirtheite marboat hmanga thiar kaina senso atan, thla tin Rs. 80,000 vel sên ṭhin a ni a, kum khat chhunga marboat enkawlna sênso chu Rs. 9,00,000 chuang a tling.

Tlabung bula Khawthlangtuipuia marboat service hi ramri hungtu company-te'n an enkawl a, chawhrualin ni tin lirthei 25-30 vel a thiar kái anga chhût a ni. Mimal sumdâwnna vanga veivakte leh lirthei thiar kaina aṭang hian thla khatah Rs. 15,000 - 20,000 vel an hmu chhuak tlangpui a; official thila veivâkte erawh chuan hman man an cháwi ngai lo.

Marboat hmanga sum hmuh chhuah aiin a enkawlna atana sum hman a tam zawk a, sum hmuhchhuahin a daih bak chu a enkawltu company parukin an tum ṭhin a; thla tina company-te sum sên belhkhawm chu Rs. 55,000 - 60,000 a ni tlangpui.

Khawthlangtuipui kân tur lirtheite pawisa châwi zât hi lirthei azirin a inang lo a; a tlangpuiin lirthei tê chite'n Rs. 1,000 an chawi a, lirthei lian chite chuan Rs. 1500 an cháwi thung a ni.