Ṭanpuina hmang ṭha lawmman hlan a ni; Ṭanpuina hman sual a tawpah a pawi ṭhin - UDPA Minister

UDPA Directorate meeting room-ah nimin khan in sak ṭanpuina, PMAY – Housing for All dawng zinga sorkar laipuiin Mizoram aṭanga ti ṭha zual a thlan mi pathumte hnenah lawmman, PMAY-U Award hlan a ni a; khuallian UDPA minister K Sapdanga chuan, ṭanpuina/chhawmdawlna hman sual chu a tawpah a pawi ṭhin thu a sawi.

K Sapdanga chuan, lawmman dawngtute chu lawmman lâk phû, entawn tlak an nih thu a sawi a, "In kutchhuak ka hmuh aṭangin rilru dik tak pu a, kutchhuak chhuanawm tak nei, mi ropui tak tak ṭhenkhatin an tluk loh in ni. Sorkarin chhawmdawlna a ruahman hrang hrangte dik taka hman chuan rah ṭha leh hlâwk a chhuah ṭhin," a ti.

Ṭangkai zawk leh ṭha zawka ngaia ruahman loh anga ṭanpuina hman chu a tàwpah a pawi ṭhin tih sawiin Minister chuan, "Vawiina lawmman dawngtute erawh dik taka an sum hmuhte an hman avangin chawimawi an phû," a ti a, ṭanpuina dawngtu buaipuitu DUDO-te chungah lawmthu a sawi.

PMAY-U Award lawmman dawngtute chu - Lalmuanpuii, Champhai, Vansangliana, Mamit leh Lalramngheta, Kolasib-te an ni.

Housing for All (Urban) hi India ramah June 2015 khan tlangzarh a ni a, Mizoram pawhin kum 2015 khan a kalpui ṭan ve nghal. Kum 2022 thleng kalpui tura ruahman ni mah se, December 31, 2024 thleng pawhsei a ni.

PMAY-U hian Mizorama census town 23 a huam a, mi 36,796 hnenah in sak ṭanpuina cheng vbc. 394.47 sem a ni tawh. Mi 36,796 hnenah ṭanpuina first instalment pek a ni tawh a, mi 25,957 hnenah second instalment pek tawh niin, mi 5,984 hnenah third instalment pek tawh a ni.