Tun aṭangin Mizoram ṭha zawk i siam ang u - Education Minister

Mizoram Middle School Teachers Association (MSTA) chuan nimin khan Baptist Multipurpose Centre, Aizawlah General Conference vawi 13-na an hmang a; khuallian, School Education minister Dr Vanlalthlana chuan, tun aṭanga Mizoram ṭha zawk siampuiah zirtirtute a sáwm.

Education Minister chuan, naupangte nun kal zel tur chu zirtirtute kutah a innghat tih sawiin, "Pension hun thlenga kan tu leh fate khawvel tur ngaihtuah a ngai a, kan hahdamna leh hahchawlhna kan tuak a ngai. Kan zirlaite ṭha taka kan kaihhruai chuan nakinah kan la nuamsa dawn a, tun aṭang hian Mizoram ṭha zawk i siam ang u," a ti.

ZPM sorkarin kum thum chhunga hmalakna tur programme an duan thu sawiin Minister chuan, "Kal dan tur chiang takin kan nei a, nakumah private school-te leh education service-te kan buaipui dawn a, transfer & posting rules hi kuminah tihfel kan tum," a ti a, mahse, stakeholder-te an la inkoh kim loh thu a sawi.

Dr Vanlalthlana chuan, sikul inzawmtir (amalgamation) leh tihtawp (defunct) chungchang chu kum thar lamah an buaipui dawn thu sawiin, "Rawtnate rawn thlen u la ka duh. Sikul ṭhenkhat chu titawp rih ila, tute emawin PPP mode-in enkawl rawh se kan rawn ti dawn; kohhrante hian an enkawl thiam riau," a ti a; amalgamation & defunct hmangin sorkarin zirtirtu indaih zawkin zirna a kalpui theih dawn thu leh chu chuan zirnaah inelna thianghlim a hrin chhuah an beisei thu a sawi bawk.

MSTA Conference hi vice president S Rochama'n a kaihruai a, an member thi paruk sûnna hun an hmang. Chawhnuah kum 2024-26 chhunga hruaitu tur an thlang a; MSTA president Rosangzuala Ralte kaihhruaiin rorel a ni a, agenda 19 an ngaihtuah.

MSTA-ah hian sikul 776-ah member 2,094 an awm mek a, kum 2023-24 chhungin superannuation pension-a chhuak mi 105 an awm a ni.