Kan sorkar leh chuan NLUP kan kalpui leh dawn - Congress party

Mizoram Pradesh Congress Committee (MPCC) chuan nimin khan Vanapa Hall-ah Special Assembly an nei a; resolution siamin, an sorkar leh chuan NLUP changtlung zawk leh ṭang puihna kaikawpin ruahmanna ṭha leh changtlung an siam dawn thu an puang.

MPCC Special Assembly chuan resolution-ah, "Mizoram mipuite'n pheikhai rual taka hmasawnna kawng kan zawh theih nan kut hnathawktu leh mahni thiamthil hmanga eizawngte'n eizawnna hlâwk leh ngêlnghet an neih a ṭulin, chu chu kan ngaih pawimawh hmasak tur a ni tih kan puang. Chumi atan chuan NLUP changtlung zawk leh ṭang puihna kaikawpin ruahmanna ṭha leh changtlung kan siam ang," an ti.

Mizoram leh mipuiin thinlung taka Pathian ṭih mi hruaitu a mamawh ber tih tarlangin, MPCC chuan, "Kan ram leh mipui hruai turin Pu Lal Thanzara, MPCC president hi kan ring tawk," an ti a; an President chu Mizoram Congress member-te'n an thlâwp zel dawn thu an tarlang.

MPCC president Lal Thanzara chuan, "Kum 2028 inthlanah Congress party kan sorkar a nih chuan oil, buhfai leh chhiah uchuak taka an tihsan hi kan ennawn leh vek dawn a, economic chhanchhuahna prog­ramme rintlak NLUP hi mithiam zawkte ráwnin changtlung zawkin kan kalpui leh ngei dawn," a ti.

Lal Thanzara chuan, Congress party chu India independence sual chhuaktu, Constitution duang chhuaktu, Mizoram union territory aṭanga state puitlinga hlangkaitu an nih thu leh, Mizorama rorel rei ber an nih angin Mizoram tana hmasawnna thlen tam ber an nih thu a sawi.

Congress party chu sum enkawl thiam ber an nia sawiin Thanzara chuan, "Kan sorkar lai apiangin mipui an hlim a, sorkar hnathawkte sum leh paiah kan hrêk ngai lo. Tunah chuan sorkarin sum enkawl a thiam loh rah a lang a, pawisa lêngvâk a tlem ta a, tunlaia thlai zuar leh sumdawngte titi ber a ni," a ti.

MPCC President chuan ZPM sorkar chungchang sawiin, "An flagship programme hi anmahni duan chhuah a ni lo a, central scheme awm sa a ni. Handholding scheme hi mi náwlpui, lehkhathiam lo leh pianphunga rualbanlote tan tum chhin chi pawh a ni meuh lo, thiamna neih ngai, project siam ngai a ni zel," a ti a; sorkar chu an insawi angin an kal lo niin a sawi.

VC term tihtawi chungchangah Lal Thanzara chuan, "Tuna VC inthlan an sawn hma hi mipui kutthlakna zah lohna nasa tak a ni a, democracy palzûtna a ni. Sawhthing hralhna ṭha an hmu dawnin a lang si lo a, ruling VC neih tlem an hlau a, heti hian an che ta niin a lang," a ti.

MPCC Special Assembly hi senior vice president Lalnunmawia Chuaungo-in a kaihruai a; chawhnuah President kaihhruaiin rorel a ni a, resolution an pawm a ni.