Aizawlah SARAS Fair ṭan a ni

Mizoram State Rural Livelihood Missions (MzSRLM) chuan nimin khan Aijal Club Park-ah 10th Regional Sales of Rural Artisans Society Fair (SARAS) Fair an buatsaih a, Rural Development minister Prof. Lalnilawma'n a hawng.

Prof. Lalnilawma chuan, SARAS Fair tum ber chu self help group (SHG)-te thil siam hralh leh mipui hmaa pholanna remchang siam a nih thu a sawi a, "SHG-te chu bank nena inthlun zawm tura ruahman a ni," a ti.

Minister sawi danin, public sector bank nena inthlun zawm SHG 347 a awm tawh a, loan cheng nuai 568 an la tawh, regional bural bank nena inthlun zawm SHG 3,871-te loan hmuh tawh zat chu cheng nuai 5,930 a ni a, cooperative bank nena inthlun zawm SHG 208-te loan hmuh chu nuai 249 a ni. Mizorama khaw 706-ah (SHG) 10,425 a ding tawh a, SHG hnuaiah hian chhungkaw 81,829 an inziak lut tawh a, Mizoram puma SHG-te sum che vel (revolving fund) chu vbc 15 vel a ni.

SARAS Fair hi December 16, 2024 thleng neih a ni dawn a, hmun hrang hranga SHG-te'n stall 49-ah an thil siamte an pho chhuak. Hawnna inkhawm hi MzSRLM state mission director R Zarzosanga'n a kaihruai a, lawmman chi hrang hrang sem a ni.

MzSRLM hi National Rural Livelihood Mission hnuaiah kum 2013 khan din a ni a; district 11-a RD block 28-te tuam chhuah tawh niin, khaw 706-ah SHG 10,425 din a ni tawh. SHG 10,425 hnuaiah hian chhungkaw 81,829 an inziak lut tawh a, SHG-te khaikhawm tur hian village organisation 791 leh cluster level federation 84 din a ni tawh bawk.