Bána Kaih policy hmangin mipui rilru puthmang siam­ṭhat kan tum - Duhoma

Chief minister Lalduhoma chuan nimin khan ZPM Zonute'n Ransam CK Resort-a Advance Christmas an hmannaah thu sawiin, hun rei tak chhung 'sem policy' kalpuiin Mizoram mipui rilru puthmang a hruai dik loh tawh chu Bána Kaih (Handholding) policy hmanga siamṭhat an tum thu a sawi.

Lalduhoma chuan, hun rei tak chhung sem policy hmangin Mizoram kaihhruai a lo ni tawh a, chu chuan mipui rilru puthmang a dik lo zawngin a hruai nasa niin a sawi a, "Sem policy khan mi tam tak kutdawh rilru a puttir a, chu chuan ram mipui hmasawnna tur a tiṭhuanawp nasa hle. Kalphung thar mipui sorkar erawh chuan thawhrimna kan zuara, Bána Kaih policy hmangin mipui rilru puthmang siamṭhat kan tum mek," a ti.

Bâna Kaih policy hnuaiah entrepre-neurship handholding, Chief Minister Special Pakage leh thlai thar lei kalpui mek a nih thu sawiin CM Duhoma chuan, "Hengte hi ruahmana felfai tak leh kalphung mumal tak hnuaiah lo chuan thil tih theih a ni lo," a ti a; thlai lei chungchanga ruahmanna sorkarin a siamte chu ngaihven tura mipui a chah rualin, an thawhrim rah seng ngei turin duhsakna a hlan.

Lalduhoma chuan, ZPM chu party naupang tê ni mah se, eptu an nih lai aṭangin beih rawn an hlawh thu leh sorkarna an chan hnuah pawh thu dik tâwk lo hmanga beih an la nih reng thu a sawi a, "Mipui tana thu dik hriat hleih theih loh khawpin beihna kan tâwk fo. Min beihnate lo sepui ruah tawrh ngawt hi a fuh ber lo a, mipui hnena thu dik kan puan chhuah ve fo a ṭul. Min beitute hian dâwt an hmang hreh lo a, thu dik puan chhuah kawngah ṭan kan lak a ṭul," a ti.

Mipui sorkar a pian theih nan ZPM Zonute'n an thawh hlawk thu sawiin Lalduhoma chuan, "Vawiina kan sorkarah hian Zonute hian hmun pawimawh tak an changin ka hria a, kan ram hmasawnnaah pawh hmeichhiate hian kawng tam takin mawh an phur a ni," a ti a; in chhung khur leh pasal fanau enkawl kawngah ṭan la zel turin Zonute a chah.

Inkhawm hi ZPM Zonu president R Lalawmpuii'n a kaihruai a ni.