Thiamna Thûl tlangzarh a ni

Thingtlang kilkhawr thlenga sikulte'n an hman ṭangkai tura ruahman Thiamna Thúl (Jaduui Pitara) chu nimin khan School Education minister Dr Vanlalthlana'n SCERT seminar room-ah a tlangzarh.

Education Minister chuan, naupangin bulṭhut aṭanga zirlai an man theih nan ṭan lak a ṭul thu sawiin, "Sorkar sikulte hian kan fate luhtir theihna tur khawpa ṭan kan lak a ṭul. Kan syllabus leh sikulte hi naupangte hîp tur khawpa kan siam a ngai a, chu chu rawngbawlna a ni," a ti a; MLA-te chu an bial ṭheuhah sikul enkawl bik nei tura ngen a tum thu a sawi.

SCERT Joint Director Lalduhawmi Thomte tarlan danin, National Curriculum Framework-in naupangin zirna chu infiamna behchhana siam turin a ruahman a, chumi atan chuan Thiamna Thûl ruahman niin, Mizoram chu India hmarchhakah kalpui hmasa ber a ni. Thiamna Thûlah hian naupangte'n kuta an khawih leh hman theih tur te, hmuhnawm ti paha an zir theih tur thil chi hrang 30 dah a ni.