Mizoram Science Mela buatsaih

Sports & Youth Services department leh Mizoram Science, Technology & Innovation Council (MISTIC) chuan nimin khan Innovation Facility Centre-ah Mizo-ram Science Mela an buatsaih a, Sports minister Lalnghinglova Hmar-in a hawng.

Science Mela hi 28th National Youth Festival pualin Ministry of Youth Affairs & Sports leh Ministry of Science & Technology-te ṭangkawpin state tinah an buatsaih a; thupui chu 'Innovation in Science & Technology' tih a ni. Kum 15-29 inkarte'n science lam kaihhnawiha an thil siamte an pho chhuak a, inelna neih nghal a ni bawk.

Lalnghinglova Hmar chuan, science ngaih pawimawh a ṭul thu sawiin, "Science hi subject harsa leh danglam bik ni loin, taima tak leh ṭhahnemngai taka zir chi a ni a, zirlai leh ṭhalaite'n thil siam chhuah hmangtu ringawt ni loa siam chhuaktu zinga tel ve turin hma la ang che u," a ti. Khualzahawm Lalramsanga Sailo, SYS secretary-in thu a sawi bawk.

Science Mela-ah hian district hrang hrang aṭangin mi 25 an inel a, vawiina chhunzawma zawh a ni ang. Inelnaa ti ṭha zualte chu Mizoram aiawhin January 12-26, 2025 chhunga New Delhi-a neih tur 28th National Youth Festival-ah an tel dawn a ni.