Mamita sorkar hnathawkte'n a hunah pisa an thleng lo tih MJA-in an finfiah

Mamit District MJA-te chuan November 9, Thawhṭanni khan Mamit khawpui chhunga sorkar pisa hrang hrangte sawi lâwk loin an tlawh a, sorkar hnathawkte'n a hunah pisa an kai lo tih an finfiah.

Mamit MJA-te hian Thawh­ṭanni zing dar 9:30 aṭanga dar 10 thlengin sorkar pisa eng emaw zat an enfiah a; pisa ṭan hun zing dar 9 a ni chungin an kal chinah biak tur an awm loh deuh vek. Office ṭhenkhat phei chu chowkidar-in a hawn ringawt, thawktu dang hmuh tur awm lote a ni.

MJA-te'n Mamit khawpuia sorkar pisate an tlawh kual zingah Kai apps hmangtute chuan pisa an kai hma deuh a, mahse, head of office (pisaa hotu ber)-te erawh pisaa awm an awm lo. Head of department zinga ṭhenkhatte chu Aizawl leh hmun danga Pathianni hmanga haw ṭhinte an nih thu an tarlang.

Sorkar hnathawk, Aizawl lam aṭanga Mamita awm, chawlhkar tawpa haw ṭhinte chu Thawhṭanniah Aizawla pisa dawr leh training chhuanlamin an chám khawmuang tlangpui ṭhin niin an tarlang bawk.