KHAWTHLIR

NSS-in thisen pe

Govt Zemabawk Higher Secondary School, NSS Unit-te chuan Civil Hospital, Aizawla hman turin thisen unit 80 an pe. Thisen petute hi mipa 54, hmeichhia 26 an ni. Bungtlang Higher Secondary School NSS chuan nimin khan Serchhip District Hospital-ah thisen pek an huaihawt a, zirlai mipa panga leh hmeichhia pahnihte'n thisen unit sarih an pe.

MEA inkhawmpui

Mizoram Economic Association (MEA) chuan nimin khan Hrangbana College-ah Annual Business cum Academic Conference an hmang a, minister PC Vanlalruata'n a hmanpui. PC Vanlalruata chuan, agricultural manufacturing-ah sorkarin hma lak a tum thu te, Handholding policy hmanga hmasawnna nasa tak Mizoramin a neih a beisei thute a sawi. Inkhawm hi MEA president Dr James LT Thanga'n a kaihruai a, MZU finance officer Prof. Vanlalchhawna pawhin thu a sawi.

Kawng siam dawn

Traffic SP Stephen Lalrinawma chuan hriattirna chhuahin, Khatla Ring Road (Nursery pengṭhuam leh Bungkawn junction inkar) kawng thawm ṭhat a nih dawn avangin vawiin leh naktuk hian chawhma dar 10 aṭanga tlai dar 4 thleng kawng khar a nih dawn thu a tarlang. Kawng siamna turah lirthei leh bungrua dah phal a ni lo.

Sanga notê sem

Saituala Fisheries department chuan nimin khan Indian Council of Agriculture Research, Bhubaneswar hnuaia sangha khawitu mi 50 hnenah a thlawnin sangha notê leh a chaw an sem. District fisheries development officer Zomuansangi chuan, sangha no an sem chu Mizorama la khawi ngai loh, Amur Carp a nih thu a sawi.

Raj Bhavan hawn a ni dawn

Governor chenna Raj Bhavan chu kum 2024 Krismas leh kum thar 2025 pualin mipui tlawh theiha hawn a ni dawn. Sorkar thuchhuah tarlan danin, Raj Bhavan hi kumin December 20-26 inkar leh January 1-3, 2025 inkarahte chawhma dar 10 aṭanga zan dar 7:30 thleng hawn a ni dawn a, hmar lam gate aṭanga luh theih a ni ang.