Food Security Act atan Mizoram sorkar inbuatsaih

Sorkar laipui chuan September 2015 ral hma ngeia Food Security Act (FSA) hmang turin Mizoram sorkar a hriattir a; Mizoram sorkar chu FSA hmang turin a inbuatsaih mek. Hetih lai hian, Supply minister John Rotluangliana chuan, FSA-in a huam ve lohte hamṭhatna tur sorkarin a ruahman thu a sawi.

FSA chungchangah hian tun hnai khan sorkar laipuia Ministry of Consumer Affairs, Food and Public Distribution chuan hmarchhak state-a Supply department hotute New Delhi-ah kokhawmin, joint secretary-in meeting a neihpui a; chutah chuan state tinte chu September 2015 ral hma ngeia FSA hmang turin an hriattir a, FSA hman hun chu pawhsei a nih tawh loh tur thu an lo hrilh a ni.

Vanglaini palai zawhna chhangin Food, Civil Supplies & Consumer Affairs departmnent hotute chuan, FSA chuan Mizoramah mi 7,06,296 a huam dawn tih an sawi a, "FSA-in a huam lohte chungchang chu sorkarin a ngaihtuah mek a ni," an ti.

FCSCA hotute sawi danin, FSA hnuaiah hian mi pakhatin thla khatah buhfai kg. 5 a dawng dawn a, buhfai man chu kg. 1-ah Rs. 3 a ni ang. FSA-in a huamte pawh hian thla khata an buhfai dawn zat tur hi an kham loa rin a ni a; FSA-in a huam baka buhfai mamawh an hmuh theih dan tur chu sorkar thuneihna a nih angin sorkarin tih dan tur a ruahman mek.

FSA-in a huam tur hi kum 2011 chhiarpuia mihring zat aṭanga chhût a ni a, mihring zat aṭanga tehin, khawpui (urban)-ah 44% leh thingtlang (rural)-ah 81.88% a huam ang. FSA hnuaia buhfai la thei turte thlang turin Selection Committee din a ni dawn a; Selection Committee chu state level aṭanga village level thlengin din a ni ang.

FCSCA minister John Rotluangliana chuan Vanglaini palai zawhna chhangin, FSA-in a huam ve lohte chungchang chu sorkarin a ngaihtuah tih sawiin, "An hamṭhatna tur department-in a ruahman mek a, peih thawkhat a ni tawh," a ti a; FSA-in a huam lohte hamṭhatna pek tura ruahmanna chu Congress Legislature Party-ah chhawp chhuah a ni ang a, sorkar thu thu a nih thu a sawi.

Supply Minister-in March 25, 2015-a Assembly session-a a sawi danin, FSA-in a huam tur mi 7,06,296-te hi kum 2011 chhiarpuia Mizoram mipui 64.30% an ni.

Tun dinhmunah thingtlangah mi pakhatin thla khatah ration buhfai kg. 8 zel an la thei a, FSA hnuaiah chuan mi pakhatin thla khatah buhfai kg. 1-a Rs. 3 hisápin kg. 5 chiah an dawng thei dawn a ni.

Supply department chhût danin, Mizoramah mihring 15,91,533 awm tura beisei a ni a, FSA-in a huam loh mi 8,85,237 an awm dawn. FSA-in a huam lohte chu khawpui (urban area)-a cheng mi 4,62,671 leh thingtlang (rural area)-a chêng mi 4,22,566 an ni.