CM thupek angin Lok Ayukta din tum

Law & Judicial department chu chief minister Lal Thanhawla thupek angin Lok Ayukta din turin a inbuatsaih mek a, Lok Ayukta kalpui a nih dan turah tunlai hian ruahmanna an siam mek.

Law & Judicial department aṭanga Vanglaini thudawn danin, Lok Ayukta atan ruahmanna an siam a, chu chu Finance department-ah thehlutin, Finance-in pawisa a awm loh thu an sawi avangin kalpui zui a ni lo. Mahse, tun hnai khan Chief Minister chuan sum senso hautak lo deuha Lok Ayukta kalpui theih dan tur zawng tura a tih angin, Law & Judicial chuan ruahmanna an siam.

Law & Judicial hian senso tlem thei anga lok Ayukta kalpui a nih theih nan ruahmanna siam an tum a; thawktu tur a thar la vak loa sorkar hnathawk sa hman ṭangkai dan tur an ngaihtuah a ni. A bul ṭanna atan Lok Ayukta hmunhma tur GAD-ah dil an tum.

Zawhna chhangin Law & Judicial hotute chuan, Lok Ayukta chairman leh member tur thlan an la ni lo a, mamawh hunah chairman leh member tur ruat kawngah harsatna a awm an ring lo.

Hetih lai hian, tun dinhmunah Lok Ayukta atan Mizoram sorkar chuan sum ruahman a nei lo a ni.

Mizorama hman tur Draft Lokayukta Bill, 2014 chu August 5, 2014 khan government gazette-a tihchhuah a ni a; November 13, 2014 khan Mizoram Assembly House-ah pawm a ni.